ಯಾವ ರಾಶಿಯವರು ಯಾವ ಬಣ್ಣ ಬಳಸಿದ್ರೆ ಅದೃಷ್ಟ ಹೊಡೆಯುತ್ತೆ

0
1745

ಜಾತಕವೆಂಬುದು ಮನುಷ್ಯನ ಜೀವನದ ಭವಿಷ್ಯವನ್ನು ಹೇಳುತ್ತದೆ. ರಾಶಿ ಫಲದಿಂದ ಮುಂಬರುವ ಸಮಸ್ಯೆಗಳು, ಸಂತೋಷಗಳನ್ನು ಅರಿತುಕೊಳ್ಳಬಹುದು. ಇದೇ ರೀತಿ ನಿಮ್ಮ ಜನ್ಮ ರಾಶಿಗೆ ಅನುಗುಣವಾಗಿ ಮನೆಯನ್ನು ಅಲಂಕಾರದ ಜೊತೆಗೆ ಆಧ್ಯಾತ್ಮಿಕ ಅನುಭವದಿಂದ ನೆಮ್ಮದಿ ಪಡೆಯಬಹುದು. ಯಾವ ರಾಶಿಯವರಿಗೆ ಯಾವ ಯಾವ ರೀತಿಯ ಅಲಂಕಾರದಿಂದ ಸಂತೋಷ ಸಿಗುತ್ತದೆ ಎಂಬುದರ ಬಗ್ಗೆ ಗಮನ ಹರಿಸೋಣ.

ಮೇಷ ರಾಶಿ : ಮೇಕೆ ಸಾಮರಸ್ಯ ಮತ್ತು ಶಕ್ತಿಯ ಸಂಕೇತ. ಈ ರಾಶಿಯವರು ತಮ್ಮ ಮನೆಯಲ್ಲಿ ಕೆಲವೊಂದು ವಸ್ತು ಮತ್ತು ಬಣ್ಣಗಳ ಮೂಲಕ ತಮಗೆ ಪೂರಕವಾಗುವಂತೆ ಮಾಡಿಕೊಳ್ಳಬಹುದು. ಗೋಡೆಯಲ್ಲಿ ಕೆಂಪು, ಕಿತ್ತಳೆ ಮತ್ತು ಪ್ರಖರ ಹಳದಿ ಬಣ್ಣಗಳು ಪ್ರಮುಖವಾಗಿದ್ದರೆ ಶಕ್ತಿ ಮತ್ತು ಸಾಮರಸ್ಯದ ವಾತಾವರಣ ಮನೆಯಲ್ಲಿ ಶಾಶ್ವತವಾಗಿರುತ್ತದೆ. ರತ್ನಗಳು, ಗಡಿಯಾರ, ಪುಸ್ತಕಗಳನ್ನು ಕೋಣೆಯಲ್ಲಿ ಅದರಲ್ಲೂ ಮುಖ್ಯವಾಗಿ ಬೆಡ್ ರೂಮ್‌ನಲ್ಲಿಟ್ಟರೆ ಮೇಷ ರಾಶಿಯವರಿಗೆ ನೆಮ್ಮದಿ ಸಿಗುತ್ತದೆ.

ವೃಷಭ ರಾಶಿ : ವೃಷಭ ಅಥವಾ ಎತ್ತಿನ ಚಿನ್ಹೆ ಮನೆಯಲ್ಲಿ ತುಂಬಾ ವಿನೀತ ಭಾವವನ್ನು ಸೃಷ್ಟಿಸುತ್ತದೆ. ಹಸಿರು, ಮಣ್ಣಿನ ಬಣ್ಣ, ಕಡು ಗುಲಾಬಿಗಳು ಈ ರಾಶಿಯವರಿಗೆ ಅತ್ಯುತ್ತಮ. ಹೀಗಾಗಿ ಕೋಣೆಯ ಗೋಡೆಗಳ ಬಣ್ಣದ ಆಯ್ಕೆಯಲ್ಲಿ ಇವುಗಳಿಗೆ ಆದ್ಯತೆ ನೀಡಿ. ಸೋಫಾ,, ಬ್ಲಾಂಕೆಟ್, ರಗ್, ಕಾರ್ಪೆಟ್, ಅಡುಗೆ ಉಪಕರಣಗಳು, ಮರದ ಪೀಠೋಪಕರಣಗಳನ್ನು ಸಾಧ್ಯವಾದರೆ ಈ ಬಣ್ಣದವನ್ನೇ ಖರೀದಿಸಿ. ಮೃದು-ಮಧುರ ಸಂಗೀತ ನೀಡುವ ಮ್ಯೂಸಿಕ್ ಸಿಸ್ಟಂ ಮಾತ್ರವಿರಲಿ. ಮನೆಯೊಳಗೆ ಬಿಳಿ ಸೇರಿದಂತೆ ತೆಳು ಬಣ್ಣದ ಹೂ ಬಿಡುವ ಹೂಕುಂಡ ಇಡಿ. ಕೆಂಪು ಸೇರಿದಂತೆ ಪ್ರಖರ ಬಣ್ಣಗಳಿಗೆ ಈ ರಾಶಿಯವರಿಗೆ ಅವಕಾಶವಿಲ್ಲ.

ಮಿಥುನ ರಾಶಿ : ಮಿಥುನ ರಾಶಿ ಎಂದರೆ ಸಂವಹನದ ಪ್ರತೀಕ. ಸೆಲ್ ಫೋನ್, ಲ್ಯಾಪ್‌ಟಾಪ್, ಕ್ಯಾಮರಾ, ಪೆನ್, ಪುಸ್ತಕ, ಇ-ಬುಕ್ ಹೀಗೆ ಸಂವಹನವನ್ನು ಹೆಚ್ಚಿಸುವ ವಸ್ತುಗಳು ಮಾನಸಿಕ ನೆಮ್ಮದಿ ನೀಡುತ್ತವೆ. ಹೀಗಾಗಿ ಈ ರಾಶಿಯವರು ಮನೆಯಲ್ಲಿ ಸಂವಹನ ಉಪಕರಣಗಳ ಸಂಗ್ರಹಕ್ಕೆ ಹೆಚ್ಚು ಮಹತ್ವ ನೀಡಬೇಕಾಗುತ್ತದೆ. ಹಳದಿ, ಹಸಿರು, ನೀಲಿ ಬಣ್ಣಗಳು ಇವರಿಗೆ ಲಾಭ ಮತ್ತು ಗೆಲುವನ್ನು ತಂದುಕೊಡುತ್ತವೆ.

ಕಟಕ ರಾಶಿ : ಇದು ಕುಟುಂಬ ಸಂಬಂಧಿ ಚಿನ್ಹೆ. ಈ ರಾಶಿಯವರಿಗೆ ಬೆಳ್ಳಿ ಬಣ್ಣ, ಬಿಳಿ, ಮುತ್ತಿನ ಬಿಳಿ ಅತ್ಯುತ್ತಮ. ಇನ್ನು ಫೋಟೋಗ್ರಾಫ್, ಫ್ರೇಮ್ ಮಾಡಿರುವ ಕಲಾಕೃತಿಗಳನ್ನು ಮನೆಯಲ್ಲಿಟ್ಟರೆ ಅಲಂಕಾರದ ಜೊತೆಗೆ ಈ ರಾಶಿಯವರಿಗೆ ನೆಮ್ಮದಿ ನೀಡುತ್ತದೆ. ಫೋಟೋಗ್ರಾಫ್‌ಗಳಲ್ಲಿ ಹಳೆಯ ಕಾಲೇಜು ಜೀವನ ಮೆಲುಕು ಹಾಕುವ ಫೋಟೋಗಳನ್ನೂ ಇಡಬಹುದಾಗಿದೆ.

ಸಿಂಹ ರಾಶಿ : ಇದು ಅಗ್ನಿ ತತ್ವದ ರಾಶಿ. ಶ್ರೀಮಂತಿಕೆ ಹಾಗೂ ಸ್ಟೈಲಿಶ್ ಜೀವನವನ್ನು ಇದು ಪ್ರತಿನಿಧಿಸುತ್ತದೆ. ಈ ರಾಶಿಯವರಿಗೆ ಕಿತ್ತಳೆ, ಕೆಂಪು, ಹಳದಿ ಮತ್ತು ನೇರಳೆ ಬಣ್ಣಗಳು ಉತ್ತಮ. ಕ್ಯಾಂಡಲ್, ಸ್ಯಾಟಿನ್ ತಲೆದಿಂಬು, ಆಲಂಕಾರಿಕ ಲೈಟ್‌ಗಳು, ಸಂಗೀತಕ್ಕೆ ಸಂಬಂಧಿಸಿದ ಉಪಕರಣಗಳನ್ನು ಮನೆಯಲ್ಲಿಟ್ಟರೆ ಈ ರಾಶಿಯವರಿಗೆ ಹೆಚ್ಚಿನ ನೆಮ್ಮದಿ ಸಿಗುತ್ತದೆ.

ಕನ್ಯಾ ರಾಶಿ : ಈ ರಾಶಿಯವರು ಮನೆಯಲ್ಲಿ ಪ್ರತಿಯೊಂದು ವಸ್ತುವನ್ನೂ ವ್ಯವಸ್ಥಿತವಾಗಿ ಇಡಬೇಕಾಗುತ್ತದೆ. ಅಸ್ತವ್ಯಸ್ತತೆಯನ್ನು ಈ ರಾಶಿ ಸಹಿಸುವುದಿಲ್ಲ. ಹೀಗಾಗಿ ವಸ್ತುಗಳನ್ನು ನೀಟಾಗಿ ಜೋಡಿಸಿ, ಎಲ್ಲಿಯೂ ಉಪಕರಣ, ವಸ್ತುಗಳನ್ನು ಬೇಕಾಬಿಟ್ಟಿ ಚೆಲ್ಲಿದಂತೆ ಕಾಣಬಾರದು. ಮುಖ್ಯವಾಗಿ ಮನೆ ಉಪಕರಣಗಳು, ಪುಸ್ತಕ, ಬಟ್ಟೆ ಬರೆಗಳು ಇದರಲ್ಲಿ ಸೇರುತ್ತವೆ. ಈ ರಾಶಿಯವರಿಗೆ ನೀಲಿ, ಹಳದಿ-ಹಸಿರು ಮಿಶ್ರಣ ಮತ್ತು ಕ್ರೀಮ್ ಕಲರ್ ಚೆನ್ನಾಗಿರುತ್ತದೆ.

ತುಲಾ ರಾಶಿ : ಇದು ಮಾನಸ್ಸಿಗೆ ಸಾಮರಸ್ಯದ ಭಾವನೆ ತಂದುಕೊಡುವ ರಾಶಿ. ಈ ರಾಶಿಯವರು ಮನೆಗೆ ಸಾಕಷ್ಟು ಗಾಳಿ ಬರುವಂತಹ ವ್ಯವಸ್ಥೆ ಮಾಡಿಕೊಳ್ಳಬೇಕು. ಅಂದರೆ ಮುಖ್ಯವಾಗಿ ವಿಶಾಲವಾದ ಕಿಟಕಿಗೆ ಆದ್ಯತೆ ನೀಡಬೇಕು. ಸಾಂಪ್ರದಾಯಿಕ ಶೈಲಿಯ ಅಲಂಕಾರ, ಅಕ್ವೇರಿಯಂ, ಫ್ರೆಶ್ ಹೂಗಳು ಮನೆಯಲ್ಲಿರಲಿ. ಸಾಧ್ಯವಾದಷ್ಟು ನಿಸರ್ಗ ಸಹಜವಾದ ವಸ್ತುಗಳನ್ನು ಅಲಂಕಾರಕ್ಕೆ ಬಳಸಿ. ಅಂದರೆ ಮಣ್ಣಿನ ಫ್ಲವರ್ ವಾಸ್, ನೈಸರ್ಗಿಕ ಬಣ್ಣದ ಚಿತ್ರಪಟ, ಹಳೆ ಕಾಲದ ಲ್ಯಾಂಪ್, ಕನ್ನಡಿಗಳು ಈ ರಾಶಿಯವರಿಗೆ ಉತ್ತಮ ಫಲಿತಾಂಶ ನೀಡುತ್ತವೆ.

ವೃಶ್ಚಿಕ ರಾಶಿ : ಚೇಳು ನಿಗೂಢ ರಹಸ್ಯ ಮತ್ತು ಪ್ರಬಲ ಚಿಂತನಾ ಶಕ್ತಿಯ ಪ್ರತೀಕ. ಈ ರಾಶಿಯವರು ಸಾಮಾನ್ಯವಾಗಿ ಪವಾಡ ಮತ್ತು ನೈಜ ಸ್ಥಿತಿಗಳ ನಡುವೆ ಸಮಾನಂತರ ಅಂತರ ಕಾಪಾಡಿಕೊಳ್ಳಬೇಕಾಗುತ್ತದೆ. ಕಪ್ಪು, ಕಿತ್ತಳೆ, ಕೆಂಪು ಮೊದಲಾದ ಗಾಢ ವರ್ಮದ ಕರ್ಟನ್ ಮತ್ತಿತರರ ವಸ್ತುಗಳು ಈ ರಾಶಿಯವರ ಮನೆಯಲ್ಲಿರಬೇಕು. ಜೊತೆಗೆ ವಿಶಿಷ್ಟವಾಗಿ ಕಾಣುವ ಗಿಡಗಳನ್ನು ಬೆಳೆಸಿದರೆ ಚೆನ್ನಾಗಿರುತ್ತದೆ. ಬೀರುಗಳಿಗೆ ಯಾವಾಗಲೂ ಬೀಗ ಹಾಕುವ ಹವ್ಯಾಸ ಮನೆಯಲ್ಲಿ ಉತ್ತಮ ವಾತಾವರಣ ನಿರ್ಮಿಸುತ್ತದೆ. ಮನೆಯಲ್ಲಿ ಪುನರ್ ಬಳಕೆ ಮಾಡಿದ ವಸ್ತುಗಳಿಂದ ಅಲಂಕರಿಸಿದರೆ ಇವರು ನೆಮ್ಮದಿ ಕಾಣುತ್ತಾರೆ.

ಧನು ರಾಶಿ : ಇದು ಅಗ್ನಿ ತತ್ವದ ರಾಶಿ. ಪ್ರಯಾಣ, ಸಾಹಸದಲ್ಲಿ ಇವರಿಗೆ ಆಸಕ್ತಿ ಹೆಚ್ಚು. ಆಧ್ಯಾತ್ಮಿಕತೆಯತ್ತ ಹೆಚ್ಚು ಒಲವು ತೋರುವ ಈ ರಾಶಿಯವರು ಮನೆಯಲ್ಲಿ ಧಾರ್ಮಿಕ ಪುಸ್ತಕಗಳನ್ನು ಸಂಗ್ರಹಿಸಬೇಕು. ಜೊತೆಗೆ ಆಟ, ಸಾಹಸಕ್ಕೆ ಸಂಬಂಧಿಸಿದ ಪುಸ್ತಕಗಳನ್ನು ಇಡಬೇಕು. ಕಡು ನೇರಳೆ, ಆಕಾಶ ನೀಲಿ, ಹಸಿರು ಮಿಶ್ರಿತ ನೀಲಿ ಈ ರಾಶಿಯವರಿಗೆ ಉತ್ತಮ.

ಮಕರ ರಾಶಿ : ಶನಿ ಗ್ರಹದಿಂದ ಪ್ರೇರೇಪಿತವಾಗಿರುವ ಈ ರಾಶಿ ಸತ್ವ ಪರೀಕ್ಷೆ ಮತ್ತು ಸನ್ನಿವೇಶಗಳಿಂದ ಪ್ರಭಾವಿತವಾಗುತ್ತದೆ. ಹೀಗಾಗಿ ಈ ರಾಶಿಯವರು ಮನೆಯಲ್ಲಿ ದೀರ್ಘ ಬಾಳಿಕೆಯ ಬಣ್ಣವನ್ನು ಬಳಸುವುದು ಬೇಡ. ತಾತ್ಕಾಲಿಕವಾಗಿ ಬದಲಾಯಿಸುವ ಬಣ್ಣಗಳ ಬಳಕೆ ಇರಲಿ. ಮನೆಯಲ್ಲಿ ನೈಸರ್ಗಿಕ ವಸ್ತುಗಳು, ಅಪರೂಪದ ಲೋಹಗಳ ಸಂಗ್ರಹವಿರಲಿ. ಕಡು ಮಣ್ಣಿನ ಬಣ್ಣ, ಎಲೆ ಹಸಿರು, ತಿಳಿ ಕಂದು ಈ ರಾಶಿಯವರಿಗೆ ಉತ್ತಮ.

ಕುಂಭ ರಾಶಿ : ಈ ರಾಶಿಯು ಹೆಚ್ಚು ಸ್ಥಳಾವಕಾಶವನ್ನು ಬಯಸುತ್ತದೆ. ಹೀಗಾಗಿ ಮನೆಯಲ್ಲಿ ವಸ್ತುಗಳನ್ನು ಸ್ವಲ್ಪ ಕಡಿಮೆ ಮಾಡಿಕೊಳ್ಳುವುದು ಉಚಿತ. ನೇರಳೆ, ತಿಳಿ ನೀಲಿ ಇವರಿಗೆ ಹೆಚ್ಚು ಆಗಿ ಬರುತ್ತದೆ. ಮನೆಯಲ್ಲಿ ಟೆಲಿಸ್ಕೋಪ್ ಸೇರಿದಂತೆ ಗ್ಯಾಡ್ಜೆಟ್‌ಗಳಿರುವ ಉತ್ತಮ. ಇನ್ನು ಐತಿಹಾಸಿಕ ಆಂಟಿಕ್‌ಗಳನ್ನು ಅಳವಡಿಸಿಕೊಳ್ಳುವುದು ಉತ್ತಮ ಫಲಿತಾಂಶ ನೀಡುತ್ತದೆ. ಹೀಗಾಗಿ ಅತ್ಯಾಧುನಿಕ ವಸ್ತುಗಳಿಗೆ ಹೆಚ್ಚಿನ ಆದ್ಯತೆ ಇರಲಿ.

ಮೀನ ರಾಶಿ : ಈ ರಾಶಿಯೂ ಕೂಡ ಹೆಚ್ಚು ಖಾಲಿ ಜಾಗವಿರುವುದನ್ನು ಬಯಸುತ್ತದೆ. ಜೊತೆಗೆ ಮನೆಯಲ್ಲಿ ಗಾಳಿ ಬೆಳಕು ಚೆನ್ನಾಗಿರುವಂತೆ ಈ ರಾಶಿಯವರು ನೋಡಿಕೊಳ್ಳಬೇಕು. ಇದಕ್ಕಾಗಿ ಈ ರಾಶಿಯವರು ಮನೆ ಮಾಡುವಾಗ ದೊಡ್ಡ ದೊಡ್ಡ ಕಿಟಕಿಗೆ ಆದ್ಯತೆ ನೀಡಬೇಕು. ಮನೆಗೆ ಸಮುದ್ರ ನೀಲಿ ಅಥವಾ ಹಸಿರು ಬಣ್ಣಗಳನ್ನು ಹೆಚ್ಚಾಗಿ ಬಳಸಿ. ಸಾಧ್ಯವಾದರೆ ಶಂಖ ಸೇರಿದಂತೆ ಸಮುದ್ರದ ಉತ್ಪನ್ನಗಳು ಮನೆಯ ಅಲಂಕಾರದಲ್ಲಿ ಪ್ರಮುಖ ಪಾತ್ರ ವಹಿಸುವಂತೆ ನೋಡಿಕೊಳ್ಳಿ. ಕರ್ಟನ್‌ಗಳ ಅಂಚುಗಳು ಶಂಖ, ಮುತ್ತಗಳಿಂದ ಕೂಡಿರುವಂತೆ ನೋಡಿಕೊಂಡರೆ ಅತ್ಯುತ್ತಮ.

LEAVE A REPLY

Please enter your comment!
Please enter your name here